പാലാ പുലിയന്നൂർ തമിഴ് ബ്രാഹ്മണ സമൂഹത്തിന്റെ നവരാത്രിയാഘോഷങ്ങൾ നടന്നു. ദേവീ ഉപാസനയ്ക്കും ദേവീപ്രീതിക്കുമുള്ള ഉത്തമമാർഗ്ഗമാണ് നവരാത്രി വ്രതം. വിദ്യാർത്ഥികൾക്ക് മാത്രമല്ല ഏതു പ്രായത്തിലുള്ളവർക്കും മാതൃ സ്വരൂപിയായ ദേവിയുടെ അനുഗ്രഹത്തിനായി നീണ്ടു നില്ക്കുന്ന ഈ വ്രതം അനുഷ്ഠിക്കാവുന്നതാണ്. ബൊമ്മക്കൊലു പ്രതിഷ്ഠിച്ചായിരുന്നു അനുഷ്ഠാനച്ചടങ്ങുകള്.
ഒൻപതു ദിവസം വ്രതം അനുഷ്ഠിക്കുവാൻ സാധിക്കാത്തവർക്ക് 7, 5, 3, 1 എന്നീ ക്രമത്തിലും അനുഷ്ഠിക്കാമെന്ന് വിധിയുണ്ട്. എല്ലാ ദിവസവും വ്രതം നോക്കാൻ കഴിയാത്തവർ സപ്തമി, അഷ്ടമി, നവമി എന്നീ ദിവസങ്ങളിൽ വ്രതം നോക്കണം. മഹാകാളി, മഹാലക്ഷ്മി, സരസ്വതീ എന്നീ ദേവീ ഭാവങ്ങളെയാണ് ഈ ദിവസങ്ങളിൽ പൂജിക്കേണ്ടത്.
പുലിയന്നൂർ തമിഴ് ബ്രാഹ്മണ സമൂഹം വർഷങ്ങളായി ഈ ചടങ്ങുകൾ ആചരിക്കുന്നുണ്ട്. ഈ സമൂഹത്തിലെ ഇരുപത്തിയഞ്ചോളം കുടുംബങ്ങളാണ് നവരാത്രി ആഘോഷങ്ങളിൽ പങ്കെടുക്കുന്നത്. നവരാത്രി നാളുകളിൽ ഇവിടെയെത്തുന്ന സുമംഗലികളായ സ്ത്രീകൾക്ക് മധുരവും വെറ്റിലയും പാക്കും ദക്ഷിണയും നല്കുന്നു.
പുലിയന്നൂർ തമിഴ് ബ്രാഹ്മണ സമൂഹം പ്രസിഡന്റ് വി.ശ്രീനിവാസൻ അയ്യർ, സെക്രട്ടറി എൻ.എ.മണി, വനിതാ വിഭാഗം ചുമതലക്കാരായ വി.ചെല്ലമണി, ഭാഗ്യലക്ഷ്മി, ലക്ഷ്മി രാജേഷ് എന്നിവരുടെ നേതൃത്വത്തിലായിരുന്നു ഇത്തവണ നവരാത്രി ആഘോഷങ്ങൾ നടന്നത്.
വീഡിയോ കാണാം... Click Here
