പാലാ: പാലായുടെ ജനവികാര തേരിലേറി ഇടതു മുന്നണി സ്ഥാനാര്ത്ഥി മാണി സി കാപ്പന്റെ കുതിപ്പ് തുടരുന്നു. മണ്ഡലത്തിലെ പര്യടന പരിപാടി 18നു പൂര്ത്തീകരിച്ചതോടെ തികഞ്ഞ ആത്മവിശ്വാസത്തിലാണ് മാണി സി കാപ്പനും മുന്നണി നേതാക്കളും.
തെരഞ്ഞെടുപ്പ് വിജ്ഞാപനത്തിനൊപ്പം സ്ഥാനാര്ത്ഥിയെ പ്രഖ്യാപിച്ചതും ആദ്യം മുതല് തന്നെ പ്രചാരണത്തില് പുലര്ത്തിയ ആധിപത്യവും ഇടതുമുന്നണിക്ക് കരുത്ത് പകര്ന്നിട്ടുണ്ട്. അസ്വാരസ്യങ്ങളില്ലാതെ ഒരുമയോടെയുള്ള പ്രവര്ത്തനമാണ് ഇടതു മുന്നണി തെരഞ്ഞെടുപ്പിലുടനീളം കാഴ്ചവച്ചത്. ചിട്ടയായ പ്രവര്ത്തനം അടിത്തട്ടു മുതല് ആവിഷ്ക്കരിച്ചു നടപ്പാക്കുകയായിരുന്നു.
കടന്നു ചെന്ന മേഖലകളിലെല്ലാം ഗംഭീര സ്വീകരണമാണ് കാപ്പനു ലഭിച്ചത്. മുന് കായികതാരം, സിനിമാ നിര്മ്മാതാവ്, നടന്, പൊതുപ്രവര്ത്തകന് തുടങ്ങിയ വിശേഷണങ്ങളെല്ലാം പരിചയത്തിന്റെ വ്യാപ്തി വര്ദ്ധിപ്പിച്ചു. എന്സിപിയുടെ ദേശീയ നേതാവെന്ന നിലയില് ദേശീയ സംസ്ഥാന രാഷ്ട്രീയത്തിലെ ബന്ധങ്ങള് പാലായ്ക്കു മുതല്ക്കൂട്ടാവുമെന്നും സംശയമില്ല.
