പാലാ നഗരസഭാ ചെയർപേഴ്സണായി മായാ രാഹുൽ തെരഞ്ഞെടുക്കപ്പെട്ടു

പാലാ നഗരസഭയുടെ പുതിയ ചെയർപേഴ്സണായി മായാ രാഹുൽ തെരഞ്ഞെടുക്കപ്പെട്ടു. കോൺഗ്രസ് വിമത ഗ്രൂപ്പിന് എൽ.ഡി.എഫ് (LDF) പിന്തുണ നൽകിയതോടെയാണ് മായാ രാഹുലിന്റെ വിജയം ഉറപ്പായത്. 26 അംഗ കൗൺസിലിൽ 16 വോട്ടുകൾ മായാ രാഹുൽ നേടിയപ്പോൾ, യു.ഡി.എഫ് (UDF) സ്ഥാനാർത്ഥിയായ റിയ ചീരാൻകുഴിക്ക് 10 വോട്ടുകൾ ലഭിച്ചു.  മുൻപ് എൽ.ഡി.എഫ് കൊണ്ടുവന്ന അവിശ്വാസ പ്രമേയത്തെ അനുകൂലിച്ച കോൺഗ്രസ് വിമത അംഗം ലിസിക്കുട്ടി മാത്യു, ഇത്തവണ ഔദ്യോഗിക പക്ഷത്തിന് പിന്തുണ നൽകിയതോടെയാണ് യു.ഡി.എഫിന് 10 വോട്ടുകൾ ലഭിച്ചത്.

.പുറത്താക്കപ്പെട്ട 4 കോൺഗ്രസ് അംഗങ്ങളും സ്വതന്ത്രയായി വിജയിച്ച മായാ രാഹുലും അടങ്ങുന്ന 5 അംഗ വിമത ഗ്രൂപ്പിന് എൽ.ഡി.എഫ് പിന്തുണ പ്രഖ്യാപിച്ചിരുന്നു. ഇതിൽ ഒരാൾ യു.ഡി.എഫ് ഔദ്യോഗിക പക്ഷത്തേക്ക് തിരികെ മാറിയതോടെ, 4 അംഗങ്ങളുള്ള ഭരണപക്ഷ ഗ്രൂപ്പിന് 12 അംഗങ്ങളുള്ള എൽ.ഡി.എഫ് പുറത്തുനിന്ന് പിന്തുണ നൽകുകയായിരുന്നു.

.സ്വതന്ത്ര കൂട്ടായ്മയിലെ 3 അംഗങ്ങളുടെയും, 19-ാം വാർഡിൽ നിന്ന് കോൺഗ്രസ് വിമതയായി വിജയിച്ച മായാ രാഹുലിന്റെയും ഉൾപ്പെടെ 14 അംഗങ്ങളുടെ പിന്തുണയോടെയാണ് മുൻ ചെയർമാൻ ദിയ ബിനു പുളിക്കക്കണ്ടം അധികാരത്തിലെത്തിയിരുന്നത്. എന്നാൽ ദിയ ബിനുവിനെതിരെ എൽ.ഡി.എഫ് കൊണ്ടുവന്ന അവിശ്വാസ പ്രമേയത്തെ യു.ഡി.എഫിലെ 5 അംഗങ്ങൾ പിന്തുണച്ചതോടെയാണ് ഭരണസമിതി പുറത്താവുകയും പുതിയ തെരഞ്ഞെടുപ്പിലേക്ക് വഴിമാറുകയും ചെയ്തത്.

.മായാ രാഹുലിന്റെ വിജയത്തോടെ എൽ.ഡി.എഫിന് നിർണ്ണായക സ്വാധീനമുള്ള പുതിയ ഭരണസമിതി നിലവിൽ വന്ന സാഹചര്യത്തിൽ, ഇനി വൈസ് ചെയർമാൻ പദവിയിലേക്ക് ആരെത്തും എന്നതിനെച്ചൊല്ലിയുള്ള ചർച്ചകൾ സജീവമായി പുരോഗമിക്കുകയാണ്. നഗരസഭാ കൗൺസിൽ ഹാളിൽ നടന്ന തെരഞ്ഞെടുപ്പ് പ്രക്രിയകൾക്ക് പാലാ DEO ജോളി മോൾ ഐസക് വരണാധികാരിയായി നേതൃത്വം നൽകി.