പ്ലാസ്റ്റിക് നിരോധനം നിലവില് വന്നതോടെ തിരുനാളോഘാഷവും പരിസ്ഥിതി സൗഹൃദമാക്കി മാറ്റുകയാണ് പൂഞ്ഞാര് ചെറുപുഷ്പം ആശ്രമദേവാലയം. പ്ലാസ്റ്റിക് തോരണങ്ങള്ക്ക് പകരം ഡിസൈനര് തുണികൊണ്ടുള്ള തോരണമാണ് പള്ളിയും പ്രദിക്ഷണവഴികളും അലങ്കരിക്കാന് ഉപയോഗിച്ചിരിക്കുന്നത്.
പ്ലാസ്റ്റിക്കിന് ബദല് മാര്ഗങ്ങള് സാധ്യമാണെന്ന സന്ദേശം പൊതുസമൂഹത്തിന് നല്കുകയാണ് പൂഞ്ഞാര് ആശ്രമദേവാലയം. തോരണങ്ങള്ക്ക് പകരം പരിസ്ഥിതി സൗഹാര്ദ്ദപരമായ ബദല്മാര്ഗം എന്തെന്ന ആശ്രമപ്രിയോര് ഫാ. ജെയിംസ് നീണ്ടൂശേരിയുടെ ചിന്തയാണ് തുണിത്തോരണത്തിലേയ്ക്ക് എത്തിയത്. സെന്റ് ആന്റണീസ് സ്കൂള് മാനേജര് കൂടിയായ ഫാ.ജെയിസിന്റെ ആശയം പൂര്ത്തീകരിച്ചത് സ്കൂള് കുട്ടികള് കൂടി പങ്കുചേര്ന്നാണ്. തുണി വാങ്ങുന്നതിനായി അല്പം തുക ചെലവായെങ്കിലും പുനരുപയോഗം വഴി വരുംവര്ഷങ്ങളിലെ ചെലവ് കുറയ്ക്കാനാകുമെന്ന് ഫാ.ജെയിംസ് പറഞ്ഞു.
ഒഴിവുസമയങ്ങളില് പിടിഎയും സമീപത്തെ ക്ലാരമഠത്തിലെ സിസ്റ്റേഴും വിദ്യാര്ത്ഥികള്ക്കൊപ്പം പങ്കുചേര്ന്നു. മണ്ണില് വീണാലും അഴുകിനശിക്കുന്ന തുണികൊണ്ടുള്ള തോരണം തികച്ചും പരിസ്ഥിതി സൗഹാര്ദ്ദപരമാണ്. ഉപയോഗശൂന്യമായ തുണികള് ഉപയോഗിക്കുന്നതിലൂടെ ചെലവും കുറയ്ക്കാമെന്ന് വിദ്യാര്ത്ഥികള് പറയുന്നു. പുതുവര്ഷത്തില് കേരളം പ്ലാസ്റ്റിക് നിരോധനം നടപ്പാക്കിയപ്പോള് ഉല്സവാ-തിരുനാള് ആഘോഷങ്ങള്ക്ക് ബദല്മാര്ഗം കാട്ടിനല്കാനായതിന്റെ സന്തോഷത്തിലാണ് സെന്റ് ആന്റണീസ് സ്കൂള് ആശ്രമദേവാലയവും.
