ഭൂപരിഷ്കരണനിയമത്തില് കാലോചിതമായ പരിഷ്കരണം അനിവാര്യമാണെന്ന് പി.സി ജോര്ജ്ജ് എംഎല്എ. സാധാരണക്കാര്ക്കും പിന്നോക്കക്കാര്ക്കും സഹായകരമായ രീതിയില് പതിറ്റാണ്ടുകള് പിന്നിട്ട നിയമത്തെ പരിഷ്കരിക്കേണ്ട സമയം അതിക്രമിച്ചിരിക്കുകയാണെന്നും എംഎല്എ കൂട്ടിച്ചേര്ത്തു. ഈരാറ്റുപേട്ട ബ്ലോക്ക് തലത്തില് ലൈഫ് ഭവനപദ്ധതി ഗുണഭോക്താക്കളുടെ സംഗമവും അദാലത്തും ഉദ്ഘാടനം ചെയ്യുകയായിരുന്നു അദ്ദേഹം.
കേരളം പോലുള്ള ചെറിയ സംസ്ഥാനത്ത് കൂടുതല് വീടുകള് നിര്മിക്കാനുള്ള സ്ഥലപരിമിതി പ്രശ്നമാണ്. ചെറിയ സ്ഥലത്ത് ഒരുവീട് നിര്മിക്കുന്നതിന് പകരം ഫഌറ്റ് രീതിയില് നിരവധി കുടുംബങ്ങളെ പരിമിതമായ സ്ഥലത്ത് ഉള്ക്കൊള്ളിക്കാന് സാധിക്കണമെന്നും എംഎല്എ പറഞ്ഞു. കാലം മാറിയ സാഹചര്യത്തില് കാലഹരിണപ്പെട്ട ഭൂപരിഷ്കരണനിയമത്തെ പൊളിച്ചെഴുതണമെന്നും അദ്ദേഹം ആവശ്യപ്പെട്ടു.
ആകെ 504 വീടുകളാണ് ലൈഫ് പദ്ധതിയ്ക്ക് കീഴില് ബ്ലോക്ക് പരിധിയില് പണികഴിപ്പിച്ചിരിക്കുന്നത്. 141 വീടുകള് പണിതീര്ത്ത് തിടനാട് പഞ്ചായത്താണ് മുന്നില്.
അരുവിത്തുറ സെന്റ് ജോര്ജ്ജ് കോളേജ് ഓഡിറ്റോറിയത്തില് നടന്ന സമ്മേളനത്തില് മാണി സി കാപ്പന് എംഎല്എ അധ്യക്ഷത വഹിച്ചു. ആന്റോ ആന്റണി എംപി മുഖ്യപ്രഭാഷണം നടത്തി. തോമസ് ചാഴിക്കാടന് എംപി, ബ്ലോക്ക് പഞ്ചായത്ത് പ്രസിഡന്റ് ആര് പ്രേംജി, ലൈഫ് കോര്ഡിനേറ്റരര് സുഭാഷ് സിഎന്, പ്രോജക്ട് ഡയറക്ടര് പി.എസ് ഷിനോ, ജില്ലാ പ്ലാനിംഗ് ഓഫീസര് ടെസ്വി മാത്യു, അഫ്സല്, ജയ്സണ്, ത്രിതല പഞ്ചായത്ത് പ്രസിഡന്റുമാര്, അംഗങ്ങള് ഉദ്യോഗസ്ഥര് തുടങ്ങിയവര് സംബന്ധിച്ചു.
