എച്ച്എംപിവി ഇതുവരെ 6 കേസുകളാണ് രാജ്യത്ത് റിപ്പോര്ട്ട് ചെയ്തത്. ബെംഗളൂരുവില് രണ്ടും ചെന്നൈയില് രണ്ടും അഹമ്മദാബാദിലും കൊല്ക്കത്തയിലും ഒന്ന് വീതവുമാണ് രോഗബാധ റിപ്പോര്ട്ട് ചെയ്തത്. യെലഹങ്കയിലെ ബാപ്റ്റിസ്റ്റ് ആശുപത്രിയില് ചികിത്സ തേടിയ എട്ടും മൂന്നും മാസം പ്രായമുള്ള ആണ്കുഞ്ഞിനും പെണ്കുഞ്ഞിനുമാണ് രോഗബാധ കണ്ടെത്തിയത്. ബ്രോങ്കോ ന്യുമോണിയ ബാധിച്ച് ചികിത്സ തേടിയ മൂന്ന് മാസം പ്രായമുള്ള പെണ്കുഞ്ഞിന് കഴിഞ്ഞയാഴ്ചയാണ് രോഗബാധ സ്ഥിരീകരിച്ചത്. ജനുവരി 3-നാണ് ഇതേ ആശുപത്രിയില് എട്ട് മാസം പ്രായമുള്ള ആണ്കുഞ്ഞിനും രോഗം സ്ഥിരീകരിക്കുന്നത്. കൊല്ക്കത്തയില് അഞ്ച് മാസം പ്രായമുള്ള കുഞ്ഞിന് ഈ രോഗബാധ റിപ്പോര്ട്ട് ചെയ്തത് കഴിഞ്ഞ നവംബറിലാണ്. അഹമ്മദാബാദിലെ ചാന്ദ് ഖേഡയില് ഈ രോഗബാധ കണ്ടെത്തിയിരിക്കുന്നതും അഞ്ച് മാസം പ്രായമുള്ള കുഞ്ഞിനാണ്.
ഇന്ത്യയില് ഹ്യൂമന് മെറ്റാന്യൂമോ വൈറസ് റിപ്പോര്ട്ട് ചെയ്തിട്ടുണ്ടെന്ന വാര്ത്തയില് ആശങ്കപ്പെടേണ്ടതില്ലെന്ന് ആരോഗ്യ വകുപ്പ് മന്ത്രി വീണാ ജോര്ജ്. വൈറസ് ബാധ സ്ഥിരീകരിച്ചതോടെ സംസ്ഥാനം നേരത്തെ തന്നെ നടപടി സ്വീകരിച്ചിരുന്നു. ആരോഗ്യ വിദഗ്ധരുമായി സംസാരിച്ച് പ്രതിരോധം ശക്തമാക്കിയിട്ടുണ്ടെന്നും മന്ത്രി വ്യക്തമാക്കി. എച്ച്.എം.പി.വി. ബാധിച്ചാല് ഗുരുതരമാകാന് സാധ്യതയുള്ള പ്രായമായവര്, കുഞ്ഞുങ്ങള്, ഗര്ഭിണികള്, ഗുരുതര രോഗമുള്ളവര്, കിടപ്പ് രോഗികള്, ശ്വാസകോശ സംബന്ധമായ രോഗലക്ഷണങ്ങളുള്ളവര് എന്നിവര് ശ്രദ്ധിക്കേണ്ടതാണ്. എച്ച്.എം.പി.വി. വരാതിരിക്കാന് മാസ്ക് ധരിക്കുന്നതാണ് അഭികാമ്യം. കൂടാതെ ശ്വാസകോശ അണുബാധയുള്ള ആളുകളില് നിന്നും അകലം പാലിക്കുകയും വേണം. രോഗങ്ങളുള്ള സമയത്ത് കുട്ടികളെ സ്കൂളില് വിടരുത്. എന്തെങ്കിലും രോഗലക്ഷണങ്ങള് കണ്ടാല് ചികിത്സ തേടണമെന്നും മന്ത്രി അഭ്യര്ത്ഥിച്ചു.
2001ല് കണ്ടെത്തിയ വൈറസാണെങ്കിലും എച്ച്എംപിവിക്കായി പ്രത്യേക പരിശോധനകള് ഇന്ത്യ അടക്കമുള്ള രാജ്യങ്ങളില് നടക്കാറുണ്ടായിരുന്നില്ല. കൊവിഡ് 19 പോലെ പുതിയൊരു വൈറസല്ല എച്ച്എംപിവി എന്നതിനാല് ആശങ്കപ്പെടേണ്ട സാഹചര്യമില്ലെന്ന് ഐസിഎംആര് അറിയിച്ചു. രാജ്യത്ത് പലര്ക്കും ഈ രോഗബാധ വന്ന് പോയിരിക്കാം. സാധാരണ ജലദോഷപ്പനിയുടെ ലക്ഷണങ്ങള് കാണിക്കുന്ന ഈ വൈറസ് അപൂര്വം കേസുകളില് മാത്രമാണ് ഗുരുതര ആരോഗ്യപ്രശ്നങ്ങളുണ്ടാക്കുന്നത്. ശ്വാസകോശസംബന്ധിയായ അസുഖങ്ങളുടെ സാഹചര്യം വിലയിരുത്തി വരികയാണെന്നും വലിയ ക്ലസ്റ്ററുകളായുള്ള വര്ദ്ധന ഇത്തരം രോഗങ്ങളില് ഇന്ത്യയിലുണ്ടായിട്ടില്ലെന്നും കേന്ദ്ര ആരോഗ്യമന്ത്രാലയം അറിയിച്ചു.
വാട്സ്ആപ് ചാനലില് അംഗമാകാന് ഇവിടെ ക്ലിക് ചെയ്യൂ
0 Comments