പാലാ നഗരസഭ സ്റ്റേഡിയത്തിലെ സിന്തറ്റിക് ട്രാക്ക് നവീകരണത്തിനായി ഏഴുകോടി രൂപ അനുവദിച്ചതായി മാണി സി.കാപ്പൻ എം.എൽ.എ. മുഖ്യമന്ത്രിയുടെ നവകേരളസദസ്സിൽ ലഭിച്ച നിവേദനങ്ങളിൽ മുൻഗണനാക്രമം നിശ്ചയിക്കാൻ സ്ഥലം എം.എൽ.എമാരെ ചുമതലപ്പെടുത്തിയിരുന്നു. വിവിധ വകുപ്പുകളിൽ നിന്നുള്ള നിർദ്ദേശങ്ങളിൽ നിന്നും നൂറുക്കണക്കിന് കായികതാരങ്ങളെ വളർത്തിയ നഗരസഭ സ്റ്റേഡിയമാണ് അത്യാവശ്യമെന്ന് ജില്ലാ കളക്ടറെ രേഖാമൂലം അറിയിച്ചതിനെ തുടർന്നാണ് തീരുമാനമായത്.
അനന്ത സാദ്ധ്യതകളുള്ള കായികരംഗത്ത് ഈ പ്രദേശത്തു നിന്ന് പ്രഗത്ഭരായ താരങ്ങൾ വളർന്നു വരുന്നതിനുള്ള സാഹചര്യമൊരുക്കാനാണ് സിന്തറ്റിക് ട്രാക്ക് പുനരുദ്ധാരണത്തിന് ശുപാർശ നൽകിയതെന്ന് മാണി സി.കാപ്പൻ പറഞ്ഞു. കോട്ടയം ജില്ലയിൽ പാലായിൽ മാത്രമുള്ള സിന്തറ്റിക് ട്രാക്ക് വെള്ളപ്പൊക്കത്തിൽ നശിച്ചിരുന്നു.
വേണ്ട രീതിയിൽ പരിപാലിക്കാത്തതിനാൽ സ്റ്റേഡിയം നശിക്കുന്നതിനെ സംബന്ധിച്ചും പ്രതിഷേധമുയർന്നിരുന്നു. സിന്തറ്റിക് ട്രാക്കിൻ്റെ നവീകരണത്തിന് മുൻകൈ എടുത്ത എം.എൽ.എയെ വിവിധ കായിക സംഘടനാ ഭാരവാഹികൾ അഭിനന്ദിച്ചു.
വാട്‌സ്ആപ് ചാനലില്‍ അംഗമാകാന്‍ ഇവിടെ ക്ലിക് ചെയ്യൂ
0 Comments