എൽഡിഎഫ് സർക്കാർ അധികാരത്തിൽ വന്നാൽ റബ്ബറിന് 250 രൂപ തറവില പ്രഖ്യാപിക്കുമെന്ന് ജോസ് കെ മാണി ഉൾപ്പെടെ കഴിഞ്ഞ തെരഞ്ഞെടുപ്പിൽ എൽഡിഎഫ് പ്രകടനപത്രികയിൽ പ്രഖ്യാപിച്ച് അധികാരത്തിൽ വന്നവർ റബറിന്റെ ഉത്പാദന ചിലവായ 200 രൂപ പോലും കർഷകർക്ക് ലഭ്യമാക്കാതെ പാലായിൽ നടക്കുന്ന ജനസദസിൽ പങ്കെടുക്കുന്ന ജോസ് കെ മാണി കർഷക വഞ്ചനക്ക് കൂട്ട് നിൽക്കുകയാണെന്ന് യുഡിഎഫ് കോട്ടയം ജില്ലാ ചെയർമാൻ സജി മഞ്ഞക്കടമ്പിൽ ആരോപിച്ചു.
ഉമ്മൻചാണ്ടി മന്ത്രിസഭയിൽ ധനമന്ത്രിയായിരുന്ന കെഎം മാണി സാർ തുടക്കം കുറിച്ച റബർ വില സ്ഥിരതാഫണ്ടും , കാരുണ്യ ചികിത്സാപദ്ധതിയും , പാലായിലെ ജനസദസിൽ പുനരാരംഭിക്കുവാൻ തീരുമാനമെടുപ്പിക്കാൻ ആർജ്ജവത്വം കാണിക്കണമെന്നും സജി ആവശ്യപ്പെട്ടു.
വിലക്കയറ്റം കൊണ്ടും കാർഷിക വിളകളുടെ വില തകർച്ച കൊണ്ടും ആത്മഹത്യയുടെ വക്കിൽ നിൽക്കുന്ന ജനങ്ങൾക്ക് മുന്നിൽ ജനസദസുമായി കടന്നു വന്നിരിക്കുന്ന ഇടതുപക്ഷം ജനങ്ങളെ വിഡ്ഢികളാക്കുകയാണെന്നും സജി കുറ്റപ്പെടുത്തി.
വാട്‌സ്ആപ് ചാനലില്‍ അംഗമാകാന്‍ ഇവിടെ ക്ലിക് ചെയ്യൂ
0 Comments