മൂന്നിലവ് ഗ്രാമപഞ്ചായത്ത് പതിമൂന്നാം വാർഡിലെ അംഗൻവാടി നിർമ്മാണം പാതിവഴിയിൽ നിലച്ചു. 12 ലക്ഷത്തോളം രൂപാ മുടക്കിയ ഈ പദ്ധതി ഉപേക്ഷിച്ച് പത്താം വാർഡിൽ പുതിയൊരു അംഗൻവാടി നിർമ്മിക്കാനുള്ള നീക്കമാണിപ്പോൾ ഗ്രാമ പഞ്ചായത്ത് നടത്തുന്നതെന്നാണ് ആരോപണം.
പദ്ധതിക്ക് സ്ഥലം വാങ്ങിയതിലടക്കം അഴിമതിയുണ്ടെന്നാണ് ആരോപണം. വകുപ്പ് മന്ത്രിക്കും, വിജിലൻസിനും പരാതി നൽകാനുള്ള നീക്കത്തിലാണ് പ്രദേശവാസികൾ.
ആറു വർഷം മുൻപാണ് അംഗൻവാടി നിർമ്മാണത്തിനായി ഗ്രാമപഞ്ചായത്ത് സ്വകാര്യ വ്യക്തിയിൽ നിന്നും 5 സെൻ്റ് സ്ഥലം വാങ്ങിയത്. പന്ത്രണ്ടാം വാർഡിൽ വാടകക്കെട്ടിടത്തിൽ പ്രവർത്തിച്ചിരുന്ന അംഗൻവാടിക്ക് സ്വന്തം കെട്ടിടം നിർമ്മിക്കുന്നതിനാണ് പതിമൂന്നാം വാർഡിൻ സ്ഥലം വാങ്ങിയത്.
വേൾഡ് ബാങ്ക് അനുവദിച്ച 25 ലക്ഷം രൂപയാണ് പദ്ധതിക്കായി നീക്കിവച്ചത്. പാറക്കെട്ടുകൾ നിറഞ്ഞ സ്ഥലമാണ് അങ്കൻവാടിക്കായി പഞ്ചായത്ത് ലക്ഷങ്ങൾ മുടക്കി വാങ്ങിയത്. റോഡരുകിലാണെങ്കിലും വഴി സൗകര്യവും പരിമിതം.
മൂന്ന് വർഷം മുൻപ് ഇവിടെ കെട്ടിട നിർമ്മാണമാരംഭിച്ചു. കൂറ്റൻ പാറ പൊട്ടിച്ച് കോൺക്രീറ്റ് ഫില്ലറുകൾ നിർമ്മിച്ച് ഒരു നിലയുടെ വാർക്ക പൂർത്തീകരിച്ചു. രണ്ടാം നില നിർമ്മിക്കുന്നതിനായി പാറക്കെട്ടിലടക്കം 9 കോൺക്രീറ്റ് ഫില്ലറുകൾ നിർമ്മിച്ചെങ്കിലും തുടർ നടപടിയൊന്നുമായില്ല. ഇത്രയും നിർമ്മാണ പ്രവർത്തനങ്ങൾക്കായി 12 ലക്ഷത്തോളം രൂപാ ചിലവഴിച്ചുവെന്നാണ് വിവരം.
പണി പാതിവഴിയിൽ ഉപേക്ഷിച്ച് ഫണ്ടും ലാപ്സാക്കി. ഈ സ്ഥലവും കെട്ടിടവും ഉപേക്ഷിച്ച് പത്താം വാർഡിൽ വീണ്ടും സ്ഥലം വാങ്ങിച്ച് അംഗൻവാടി നിർമ്മിക്കാനുള്ള നീക്കമാണിപ്പോൾ ഗ്രാമ പഞ്ചായത്ത് നടത്തുന്നതെന്നാണ് ആരോപണം. പത്താം വാർഡിൻ നിലവിൻ മറ്റെരു അങ്കൺവാടി പ്രവർത്തിക്കുന്നുണ്ടെന്നും വകുപ്പ് മന്ത്രിക്ക് നല്കിയ പരാതിയിൽ പറയുന്നു.
പതിനൊന്നാം വാർഡിൽ അംഗൻവാടി ഇല്ല. ആളുകൾ ഉപേക്ഷിച്ചിട്ടിരുന്ന പാറക്കെട്ട് നിറഞ്ഞ സ്ഥലം അംഗൻവാടിക്കായി വാങ്ങിയതിലും, വീണ്ടും പുതിയ സ്ഥലം വാങ്ങി കെട്ടിടം നിർമ്മിക്കുവാനുള്ള നീക്കത്തിലും ക്രമക്കേടും അഴിമതിയുമുണ്ടെന്നാണ് ആരോപണം. പുതിയ സ്ഥലം വാങ്ങി കെട്ടിടം നിർമ്മിച്ചാൽ നിലവിൽ പണി പകുതി പൂർത്തിയായ കെട്ടിടം പ്രയോജനരഹിതമാകും.
ഈ കെട്ടിട നിർമ്മാണം ഉപേക്ഷിക്കാനുള്ള കാരണവും വ്യക്തമല്ല. വീണ്ടും സ്ഥലം വാങ്ങി സ്വകാര്യ വ്യക്തികൾക്കും കരാറുകാർക്കും ലാഭമുണ്ടാക്കാൻ അവസരമൊരുക്കാതെ നിലവിലുള്ള കെട്ടിടത്തിൻ്റെ നിർമ്മാണം പൂർത്തിയാക്കി പ്രയോജനകരമാക്കണമെന്നാണ് ആവശ്യമുയരുന്നത്.
0 Comments