ചലച്ചിത്ര താരങ്ങളായ ജയറാമിന്റേയും പാര്വതിയുടേയും മകന് കാളിദാസ് ജയറാം വിവാഹിതനായി. ഗുരുവായൂരില് നടന്ന വിവാഹത്തില് മോഡലായ തരിണി കലിംഗരാരുടെ കഴുത്തില് കാളിദാസ് താലിചാര്ത്തി. ഇരുവരും ദീർഘകാലമായി പ്രണയത്തിലായിരുന്നു.
രാവിലെ 7.15നും എട്ടിനുമിടയിലെ മുഹൂര്ത്തത്തിലായിരുന്നു താലികെട്ട്. മന്ത്രി മുഹമ്മദ് റിയാസ്, കേന്ദ്ര സഹമന്ത്രിയും നടനുമായ സുരേഷ് ഗോപി, മകന് ഗോകുല് സുരേഷ് തുടങ്ങി സെലിബ്രിറ്റികള് വിവാഹത്തില് പങ്കെടുത്തു.
കഴിഞ്ഞ വെള്ളിയാഴ്ച്ച ഇരുവരും ചെന്നൈയില് പ്രീ വെഡ്ഡിങ് ആഘോഷങ്ങള് നടത്തിയിരുന്നു. കഴിഞ്ഞ നവംബറില് ചെന്നൈയിലായിരുന്നു കാളിദാസിന്റേയും തരിണിയുടേയും വിവാഹനിശ്ചയം. 2022-ല് കാളിദാസിന്റെ വീട്ടിലെ ഓണാഘോഷത്തിന് തരിണിയും പങ്കെടുത്തതോടെയാണ് ഇരുവരും തമ്മിലുള്ള പ്രണയം പരസ്യമാകുന്നത്.
നീലഗിരി സ്വദേശിയായ തരിണി 2019ല് മിസ് തമിഴ്നാട്, മിസ് സൗത്ത് ഇന്ത്യ ഫസ്റ്റ് റണ്ണര് അപ്പ് കിരീടങ്ങള് ചൂടി. 2022ലെ മിസ് ദിവാ യൂണിവേഴ്സ് സൗന്ദര്യമത്സരത്തില് തരിണിയും പങ്കെടുത്തിരുന്നു.
ചുവന്ന ഗോൾഡൻ ബോർഡറുള്ള മുണ്ടും മേൽമുണ്ടുമായിരുന്നു കാളിദാസിന്റെ വിവാഹ വേഷം. പഞ്ചകച്ചം മോഡലിലാണ് മുണ്ടുടുത്തിരുന്നത്. പീച്ച് നിറത്തിലെ സാരിയിൽ അതീവ സുന്ദരിയായി താരിണിയും.
വാട്സ്ആപ് ചാനലില് അംഗമാകാന് ഇവിടെ ക്ലിക് ചെയ്യൂ
0 Comments