പാലാ മീനച്ചിലാറ്റില്‍ കുളിക്കാന്‍ ഇറങ്ങിയവരെ നീര്‍നായ് ആക്രമിച്ചു. കടപ്പാട്ടൂര്‍ ക്ഷേത്രക്കടവില്‍ കുളിക്കാനിറങ്ങിയ രണ്ട് ശബരിമല തീര്‍ഥാടകരെയും നാട്ടുകാരായ രണ്ടാളുകളെയുമാണ് നീര്‍നായ് കടിച്ചത്. പരിക്കേറ്റവര്‍ ആശുപത്രിയില്‍ ചികിത്സ തേടി.
കടപ്പാട്ടൂര്‍ മൂലയില്‍ രാധാകൃഷ്ണന്‍ നായര്‍ (55), ക്ഷേത്രപരിസരത്തെ വ്യാപാരി എന്നിവര്‍ക്കാണ് നീര്‍നായയുടെ കടിയേറ്റത്. രാധാകൃഷ്ണന്‍ നായര്‍ പാലാ ജനറല്‍ ആശുപത്രിയിലും തുടര്‍ന്ന് കോട്ടയം മെഡിക്കല്‍ കോളേജിലും എത്തി ചികിത്സ തേടി. സ്ത്രികളുടെ കടവില്‍ കുളിക്കാന്‍ എത്തിയ സ്ത്രീ നീര്‍നായയെ കണ്ട് ഓടിരക്ഷപെട്ടു.
ശബരിമല തീര്‍ഥാടനത്തിന് എത്തിയ രണ്ട് തീര്‍ഥാടകര്‍ കഴിഞ്ഞ ആഴ്ച കടപ്പാട്ടൂര്‍ ക്ഷേത്ര ദര്‍ശനത്തിനെത്തി കുളിക്കാന്‍ ഇറങ്ങിയപ്പോഴാണ് നീര്‍നായയുടെ കടിയേറ്റത്. കഴിഞ്ഞ വര്‍ഷം മീനച്ചിലാറ്റില്‍ കിടങ്ങൂരിലും നീര്‍നായ് ആക്രമണം ഉണ്ടായിരുന്നു.
നീര്‍നായ് ശല്യം തടയാന്‍ നടപടി സ്വീകരിക്കേണ്ടത് വനം വകുപ്പ് അധികൃതരാണ്. എന്നാല്‍ സംഭവം സംബന്ധിച്ച് ക്ഷേത്രം അധികൃതരോ പൊലീസ് അധികൃതരോ റിപ്പോര്‍ട്ട് ചെയ്തിട്ടില്ല.
