ടിപി വധക്കേസ് പ്രതി കൊടി സുനിക്ക് പരോള് നല്കിയതില് എന്താണ് മഹാപരാധമുള്ളതെന്ന് സിപിഎം നേതാവ് പി ജയരാജന്. അര്ഹതയുണ്ടായിട്ടും സുനിക്ക് ആറ് വര്ഷമായി പരോള് അനുവദിച്ചില്ല. കൊവിഡ് കാലത്തുപോലും പരോള് നല്കിയിരുന്നില്ല. ഇടക്കാലത്തുണ്ടായ കേസുകളുടെ പേരില് പരോള് നല്കാതിരുന്നത് ശരിയായ തീരുമാനമാണ്. ജയില് മേധാവി ഇപ്പോള് പരോള് നല്കിയത് അമ്മയുടെ പരാതിയിലും മാനുഷിക പരിഗണനയിലുമാണ്. കൊടിയുടെ നിറം നോക്കാതെ പരോള് ശുപാര്ശ നല്കിയിട്ടുണ്ടെന്നും ജയരാജന് ഫേസ്ബുക്കില് കുറിച്ചു.
കൊവിഡ് കാലത്ത് ജീവപര്യന്തം ശിക്ഷക്കാരടക്കം എത്രയോ മാസങ്ങള് പരോളിലായിരുന്നു. കൊവിഡിന്റെ ഒരു ഘട്ടത്തിന് ശേഷം തടവുകാരോട് തിരികെ ജയിലില് പ്രവേശിക്കാന് സംസ്ഥാന ആഭ്യന്തരവകുപ്പ് ആവശ്യപ്പെട്ടെങ്കിലും സുപ്രീം കോടതിയാണ് മനുഷ്യാവകാശം പരിഗണിച്ച് കാലാവധി നീട്ടി നല്കിയത് എന്നതും അനുഭവമാണ്. കൊവിഡ് കാലത്ത് പോലും കൊടി സുനിക്ക് പരോള് നല്കിയിരുന്നില്ല. ആറുവര്ഷങ്ങള്ക്ക് ശേഷം അമ്മയുടെ പരാതിയെ തുടര്ന്ന് പരോള് നല്കിയതില് എന്ത് മഹാപരാധമാണുള്ളതെന്നും ജയരാജന് ചോദിച്ചു.
പരോള് ആവശ്യപ്പെട്ട് അമ്മ മനുഷ്യാവകാശ കമ്മീഷനാണ് ആദ്യം അപേക്ഷ നല്കിയത്. കമ്മീഷന്റെ കത്തിന്റെ അടിസ്ഥാനത്തില് ജയില് ഡിജിപി പരോള് അനുവദിക്കുകയായിരുന്നു. ടിപി വധക്കേസ് പ്രതി കൊടി സുനി പരോള് ലഭിച്ചതിനെ തുടര്ന്ന് ജയിലില് നിന്ന് പുറത്തിറങ്ങിയിരുന്നു. 30 ദിവസത്തെ പരോളാണ് അനുവദിച്ചത്.
വാട്സ്ആപ് ചാനലില് അംഗമാകാന് ഇവിടെ ക്ലിക് ചെയ്യൂ
0 Comments