Latest News
Loading...

വീട് നഷ്ടമായിട്ട് രണ്ടാഴ്ച. 3 വീട്ടുകാരുടെ ജീവിതം സ്‌കൂള്‍ ബെഞ്ചില്‍


പ്രകൃതി ദുരന്തങ്ങള്‍ ഉണ്ടാകുമ്പോള്‍ സ്ഥലത്തെത്തുന്ന ജനപ്രതിനിധികളും ഉദ്യോഗസ്ഥരും വാഗ്ദാനം ചെയ്യുന്ന ദുരിതാശ്വാസനിധി സഹായവാഗ്ദാനം എത്രത്തോളം ലഭ്യമാകുന്നു എന്നതിന്റെ നേര്‍ക്കാഴ്ചയാവുകയാണ് മേലുകാവില്‍ നിന്നുള്ള കാഴ്ച. കാറ്റില്‍ വീട് തകര്‍ന്ന 3 കുടുംബങ്ങള്‍ സ്‌കൂളിലാണ് ദിവസങ്ങളായി കഴിച്ചുകൂട്ടുന്നത്. ക്യാംപ് സന്ദര്‍ശിച്ച ജില്ലാ പഞ്ചായത്തംഗം ഷോണ്‍ ജോര്‍ജ്ജ്, അടിയന്തിര സഹായമെത്തിക്കാന്‍ ജില്ലാ ഭരണകൂടം തയാറാകണമെന്ന് ആവശ്യപ്പെട്ടു. 

മേലുകാവ് പഞ്ചയത്തലെ ചെമ്മലയില്‍ കഴിഞ്ഞ മാസം 13നാണ് ശക്തമായ കാറ്റ് നാശം വിതച്ചത്. പ്രദേശവാസികളായ കൊച്ചുപറമ്പില്‍ തങ്കച്ചന്‍, ശോശാമ്മ സക്കായി, ജൂബി നിരപ്പേല്‍ എന്നിവര്‍ക്കാണ് കാറ്റില്‍ കിടപ്പാടം നഷ്ടമായത്. പ്രകൃതി ദുരന്തുമുണ്ടായതിന്റെ പിറ്റേന്ന് തന്നെ സ്ഥലം സന്ദര്‍ശിച്ച ജനപ്രതിനിധികള്‍, സഹായവാഗ്ദാനം നല്കിയെങ്കിലും യാതൊന്നും ലഭിച്ചില്ലെന്ന് ഇവര്‍ പറയുന്നു. 


കൊച്ചുകുട്ടികളടക്കം സ്‌കൂള്‍ ബഞ്ചുകളും ഡെസ്‌കുകളും ചേര്‍ത്തിട്ടാണ് കിടക്കാനുപയോഗിക്കുന്നത്. ഭക്ഷണകാര്യം പോലും കൃത്യമായി നടക്കുന്നില്ല. പഞ്ചായത്ത് സഹായം വാഗ്ദാനം ചെയ്‌തെങ്കിലും പണമില്ലാത്തതിനാല്‍ മാര്‍ഗമില്ലെന്നാണ് ഇേേപ്പാളത്തെ നിലപാട്. 

മുഖ്യമന്ത്രിയുടെ ദുരിതാശ്വാസ നിധിയില്‍ നിന്നും സഹായം ലഭ്യമാക്കുമെന്ന വാഗ്ദാനവും നടപ്പായില്ല. രണ്ടാഴ്ചയോളം ആശുപത്രിയില്‍ കഴിഞ്ഞ കുടുംബം അവിടെ നിന്നിറങ്ങിയെങ്കിലും എവിടേയ്ക്ക് പോകണമെന്ന അറിയാതെ വലഞ്ഞ കുടുംബത്തിന് സ്‌കൂളില്‍ അഭയം നല്കുകയായിരുന്നു. സിഎംഡിആര്‍എഫില്‍ നിന്നും ഫണ്ട് ലഭിച്ചില്ലെന്നാണ് ജില്ലാ ഭരണകൂടം അറിയിച്ചതെന്ന് ഷോണ്‍ ജോര്‍ജ്ജ് പറഞ്ഞു.