Latest News
Loading...

മാണി സി കാപ്പൻ്റെ തിരഞ്ഞെടുപ്പ് പ്രചാരണത്തിന് തുടക്കമായി



പാലാ: നിയമസഭാ തിരഞ്ഞെടുപ്പ് പ്രഖ്യാപിച്ചതിനു പിന്നാലെ പാലായിലെ യു ഡി എഫ് പ്രവർത്തകരിൽ ആവേശം നിറച്ച് മാണി സി കാപ്പൻ്റെ തിരഞ്ഞെടുപ്പ് പ്രചാരണത്തിന് തുടക്കമായി. വിവിധ കേന്ദ്രങ്ങളിൽ മാണി സി കാപ്പൻ്റെ ചുവരെഴുത്തുകൾ ആരംഭിച്ചുകൊണ്ടാണ് യു ഡി എഫ് പ്രവർത്തകർ തിരഞ്ഞെടുപ്പ് പ്രചാരണത്തിന് തുടക്കമിട്ടത്. ഇതോടൊപ്പം ജനസമക്ഷം വിനീതനായ് എന്ന തലക്കെട്ടോടു കൂടിയ ബോർഡുകളും തിരഞ്ഞെടുപ്പ് പ്രചാരണത്തിൻ്റെ ഭാഗമായി പാലായുടെ വിവിധ കേന്ദ്രങ്ങളിൽ യു ഡി എഫ് പ്രവർത്തകർ ഉയർത്തി. 'ചങ്കാണ് പാലാ' എന്ന കാപ്പൻ്റെ പഞ്ച് ഡയലോഗും ബോർഡുകളിൽ ചേർത്തിട്ടുണ്ട്.

വർദ്ധിച്ച ആവേശത്തോടെയാണ് ഇത്തവണ യു ഡി എഫ് തിരഞ്ഞെടുപ്പിനെ നേരിടുന്നത്. എല്ലാ പഞ്ചായത്തുകളിലും തിരഞ്ഞെടുപ്പ് പ്രചാരണവുമായി ബന്ധപ്പെട്ട കമ്മിറ്റികൾ ആദ്യഘട്ടം ചേർന്നു കഴിഞ്ഞു.

യു ഡി എഫ് യുവജന സംഘടനകൾ അവരുടെ സ്വന്തം നിലയ്ക്കു തന്നെ പ്രചാരണ പ്രവർത്തനങ്ങൾ ആരംഭിച്ചിട്ടുണ്ട്. സമൂഹ്യ മാധ്യമങ്ങൾ വഴിയുള്ള പ്രചാരണത്തിനും തുടക്കമായി.

മണ്ഡലത്തിലെ സ്വഭാവിക വികസന പ്രവർത്തനങ്ങൾപോലും രാഷ്ട്രീയ ലക്ഷ്യത്തിനായി തടസ്സപ്പെടുത്തിയത് ജനത്തിനു മുന്നിൽ തുറന്നുകാട്ടിയുള്ള പ്രചാരണവും നടത്തും. കാലാവധി പൂർത്തിയാക്കാതെ ലോക്സഭ, രാജ്യസഭ സ്ഥാനങ്ങൾ ഒഴിഞ്ഞു മണ്ഡലത്തെ അനാഥമാക്കിയത് പ്രചരണായുധമാക്കും.

മുമ്പെങ്ങുമുണ്ടാവാത്തവിധം പാലായിൽ എവിടെയും യു ഡി എഫ് ഐക്യം ദൃശ്യമാണ്. എല്ലാ കക്ഷികളും ഒന്നിച്ചാണ് തിരഞ്ഞെടുപ്പ് പ്രചാരണം ഏകോപിപ്പിക്കുന്നത്. പരമ്പരാഗത യു ഡി എഫ് മണ്ഡലമായ പാലായിൽ പ്രചാരണത്തിന് ആദ്യം തുടക്കം കുറിച്ചുകൊണ്ട് യു ഡി എഫ് മേൽക്കൈ നേടിയിരിക്കുകയാണ്.